Dəftəri-Pünhan
Misc.
Saqi, mey ver!
Jun 8th
Ayağın öpməliyik xadimi-meyxanələrin,
Bəlkə cəm içrə görək əksini cananəmizin!
Əliağa Vahid

Bayram
Mar 20th
Yenə bayram. Yenə sonsuz zənglər, yenə təbriklər və arzular. Yenə məcburən gülümsəməli, şirin dillə cavab vermək lazımdır.
Bayramları ləğv edin. Bayramlarda sinəmdə nəyinsə sıxıldığını hiss edirəm.
Təsadüf?
Mar 15th
“Gecə gözəlinin dəli dərvişlə görüşü” sölərini mənasız və məqsədsiz olaraq yazmışdım başlığa. İndi baxdım ki, Gecə gözəli Leyli, dəli dərviş isə Məcnundur.
Çox maraqlıdır.
Qüvvə
Mar 14th
Bəzən, əlimizdə olan qüvvəni dərk edərkən, qisas almaq, o qüvvədən istifadə etmək imkanı çox cəlbedici olur. Bəzən qılıncı qaldıraraq tanıdığın zəif nöqtələrə dəqiq və güclü zərbə endirmək istəyirsən. Bəzən insanları incidərək onların əzab çəkdiklərini bilmək insana zövq verir.
Fəqət yox. Qılıncın ağırlığı məsuliyyət haqda xatırlatmalıdır. Bunu yadda saxlamaq lazımdır. Demək olar ki həmişə.
Mar 8th
Bəzən gücümüz bizi tərk edir. Nə sevinməyə, nə kədərlənməyə taqətimiz olmur.
Bəzən həssaslığımız, marağımız bizi tərk edir. İnsanların hisslərini bölüşməyi, baş verənlərə ürəkdən yanaşmağı bacarmırıq.
Sonda isə, bu haldan çıxanda, bütün toplanmış hadisələrin, hisslərin öhdəsindən birdən gəlməli oluruq.
Qar
Feb 16th
Qar – ən gözəl təbiət hadisəsidir. Gecə, səmanın ay işığına bürünən vaxtı, göydən ağ, soyuq və narın ulduzlar yağaraq ətrafı gəlin libasına geyindirir. Yeri hələ ayaq izləri ilə korlanmamış hamar qar örtüyü qoruyur. Bu mükəmməl gözəlliyə yorulmadan tamaşa etmək olar.
Səhər isə, hər yer yenə də palçıq, çirk və insan hərəkətinin izləri ilə şikəst olunmuş hala gəlir.
Qar, Qayalar, Qəsr
Jan 6th
Sabah səhər 3 günlük gündəlik həyatdan uzaqlaşaraq, qarlı qayaların üstündə yerləşən bir qəsrə çəkiləcəm. Yeni fikirlər, şəkillər və sətrlərin işıq üzü görməsinə ehtimal var. Vaxtıdı…
Biz
Jan 3rd
Biz dəyişəcəyik. Və ətrafımızdakılar buna heyrətlənərək bizlərə inanacaqlar.
Biz dəyişəcəyik. Və özümüzlə birgə gerçəkliyi də dəyişdirəcəyik.