Dəftəri-Pünhan

O səbəbdən deyirəm, dönmərik o illərə,
Ki dənizə çatmaqçün üz tutaq sahillərə.
Bizdə yağış, sizdə qar,
Dağıdılmaz divarlar,
Fərqli-fərqli diyarlar
Həbs edib canımızı.
İçirlər qanımızı
Musiqilər, kitablar.
Əzablar, iztirablar
Yaşadır ruhumuzu,
Sevirik qorxumuzu.
Gələcəkçün arzular
Dağlarda axar sular
Kimi dəryalara meyl edir.
Gecələrim meylədir.
Fikirlər, düşüncələr,
Məktublar, xatirələr…
Bəlkə könlüm dincələr.
Yağışlar gətirələr
O ellərin sorağın.
Buludlardan sorağın
Külək sədaqətini.
Gücünü, taqətini
Səfərlərə sərf edən,
Meşələri qopardan,
Uca dağlar tərpədən
Bir qüvvədir rüzigar.
Vər nə Leyla, nə Nigar,
Yalnız çöllər və dağlar,
Vardır geniş ümmanı,
Budur onun cananı.

18/01/09 20:32
Amsterdam – Brüssel qatarı.

Qurban Səidin daha bir əsəri. Xaricdə yaşayanlar daha yaxşı başa düşərlər. Əli və Nino-dan qat-qat çox xoşuma gəldi.

Sabah səhər 3 günlük gündəlik həyatdan uzaqlaşaraq, qarlı qayaların üstündə yerləşən bir qəsrə çəkiləcəm. Yeni fikirlər, şəkillər və sətrlərin işıq üzü görməsinə ehtimal var. Vaxtıdı…

A poem is never finished, only abandoned.
Paul Valery

Getmək istəyirsən, bəhanəsiz get,
Oyatma mürgülü xatirələri.
Səsin həmin səsdir, baxışın ögey,
Gedirsən səsin də yad olsun, barı.

Sən dəniz qoynuna tullanmış çiçək,
Üstünə dalğalar atılacaqdır.
Saxta məhəbbətin saxta sənəd tək,
Nə vaxtsa, üstündə tutulacaqdır.

Demirəm, sən uca bir dağsan, əyil,
Demirəm, əlacım qalıbdır sənə.
Nə səndə məhəbbət qara pul deyil,
Nə mən dilənçiyəm, əl açım sənə.

Döşənim yollar tək ayaqlarına,
Sənə yalvarım mən, bu mümkün deyil.
Qoymaram qəlbim tək vüqarım sına,
Alçalıb yaşamaq ömür-gün deyil.

Getmək istəyirsən, o yol, o da sən,
Bir cüt göz baxacaq arxanca sənin.
Getdinmi, geriyə dönmək istəsən,
Tikanlı yastığa dönəcək yerin.

Getmək istəyirsən, nə danış, nə din,
Yox ol uzaqlar tək dumanda, çəndə.
Nəyimi sevmişdin deyə bilmədin,
İndisə, yüz eyib görürsən məndə.

Getmək istəyirsən, bəhanəsiz get,
Oyatma mürgülü xatirələri.
Səsin həmin səsdir, baxışın ögey,
Gedirsən səsin də yad olsun, barı…

Nüsrət KƏSƏMƏNLİ.

Biz dəyişəcəyik. Və ətrafımızdakılar buna heyrətlənərək bizlərə inanacaqlar.
Biz dəyişəcəyik. Və özümüzlə birgə gerçəkliyi də dəyişdirəcəyik.

Hədiyyəmi aldım – qar yağır. :)

Beləliklə, həyatımın daha bir ilini başa vurdum. Yekunlar, həmişəki kimi, ziddiyyətli və mürəkkəbdirlər. Nailiyyətlərlə bərabər, səhvlərin sayı da az deyil. Daha böyük planlar və istəklər, daha çox çətinlik – bu normaldır. Bu il həyatımda böyük dəyişikliklər olacaq və onlar artıq başlayıb. Nəticələrin yaxşı vəya pis olması isə özümdən asılıdır.

Özümə ağıl, səbr və dürüstlük arzu edirəm.